UŞAQ ŞƏKLİ

UŞAQ ŞƏKLİ

07-07-2017 18:58 / Bu xəbər 3066 dəfə oxundu

Zahir Əzəmət
 
təşviqat vərəqəsi / ön cəbhəyə!

endirilmiş bayraqları güllələməyin
öldürülmüş əsgərləri tapdalamayın 
yaralılara su verin 
əsirlərə təbəssüm 
daha bir döyüş bitdi deyə gülümsəyin

işğal etdiyiniz torpaqlarda ev tikməyin
ev uçurtmayın 
qıcıqlandırmayın yiyəsiz evlərin itlərini 
həmişə üstünüzdə uşaq şəkli gəzdirin 
və unutmayın 
müharibələr yalnız 
bayağı marşları çeynəmək üçün deyil 

P.S. insanları öldürüb də 
sonra qulaqlarınızı dayamayın ürəklərinə…

2001

əsgər məktubu / arxa cəbhəyə!

sizə zəfər gətirəcəyik
bizə məktub yazın heç olmasa 
sətirlərdən ürəyiniz boy versin 
səbirlə dinləyin şikəst qayıdan 
əsgər yoldaşlarımızın gecə sayıqlamalarını 
üz çevirib getməyin uşaqlarımız dilənəndə 
su verin 
çörək verin! 
atalarımıza siqaret 
analarımıza ürək dirək verin… 

sizə zəfər gətirəcəyik 
bizə barıt qoxusu dadmayan 
səhər saxlayın 
bir az günəş 
bir az dəniz… 
bir az da soyuq xırdalan pivəsi 
şəxsən mənim üçün 

və sevməyin ay əclaflar 
bizi gözləyən qadınları