Seçkiyə getməyənlərin planı
22-02-2018 19:15 / Bu xəbər 2087 dəfə oxundu
Azərbaycanın bir qrup müxalif təşkilatı aprelin 11-nə təyin olunmuş növbədənkənar prezident seçkisinə qatılmır.
Demokratik Qüvvələrin Milli Şurası, Xalq Cəbhəsi, Klassik Xalq Cəbhəsi, Müsavat, Liberal partiyaları, REAL Hərəkatı və başqa bir neçə qurum seçkidə iştirakdan imtina edib. Bu təşkilatların seçki kampaniyası dövründə birgə addımlar atması mümkündürmü?
Milli Şuranın sədri Cəmil Həsənli Novator.az-a deyib ki, seçki kampaniyası dövründə Azərbaycan qanunlarının imkan verdiyi hüquqlardan istifadə ediləcək: "O cümlədən siyasi aksiyaların – sanksiyalaşdırılmış mitinq, piket, küçə yürüşlərinin keçirilməsi planlaşdırılır. Aksiyalarda həm seçki məsələsi, həm də Azərbaycan cəmiyyətini narahat edən digər problemlər müzakirə olunacaq.
Milli Şura boykot, yaxud seçkidə iştirak etməmək qərarı vermiş partiya və hərəkatları həmin aksiyalara dəvət edəcək. Ümid edirik ki, müxalifətin bu formatda birgə siyasi aksiyaları baş tutacaq. Birgə boykot kampaniyası, aksiyalar haqqında konkret danışıqlar olmayıb, amma seçkiyə qatılmayan təşkilatların nümayəndələri açıqlamalarında birgə tədbirlərdə iştiraka hazır olduqlarını bəyan ediblər. Yaxın günlərdə birgə görüşlərdə, söhbətlərdə bu məsələlər müzakirə edilə bilər”.
Müsavat Partiyasının başqanı Arif Hacılı Novator.az-a müxalif düşərgənin nümayəndələrinin bir araya gəlməsi üçün problem yaşanmadığını deyib: "Seçki dövrü üçün tədbirlər planımız var. Bu plana bir çox məsələ, o cümlədən ölkədə fəaliyyət göstərən xarici diplomatlar, beynəlxalq təşkilat nümayəndələri ilə görüşlər, kütləvi aksiyaların keçirilməsi, televiziyada çıxış almaq və digər təşəbbüslər daxildir.
Eyni zamanda müxalifətin birgə aksiyalar keçirməsi məsələsi müzakirə olunur. Ümumi müzakirələr var və ilkin debatlar mövcuddur. Ayrı-ayrı cəbhəçilər, "Nida” Vətəndaş Hərəkatının və digər təşkilatların nümayəndələri fəallıq göstərib hansısa nəticələrə nail olmağa cəhd edirlər. Milli Şuranın üzvü Qurban Məmmədov birgə aksiyalar təşəbbüsü ilə çıxış edərək ayrı-ayrı siyasi partiya nümayəndələri ilə görüşlər keçirib. Müxalifət təmsilçilərinin görüşləri mümkündür və heç bir problem yaşanmır”.
Novator.az-a danışan Respublikaçı Alternativ (REAL) Hərəkatının İdarə Heyətinin üzvü Azər Qasımlı deyib ki, prezident seçkisinə qatılmayan təşkilatların məsləhətləşmələrinə ehtiyac var: "Birgə edə biləcəyimiz işlərin siyahısını tutub birlikdə iş görmək mümkündür. Bunun üçün bəzi addımlar atılıb”.
2013-cü ilin oktyabrında 5 il müddətinə prezident seçilmiş İlham Əliyevin səlahiyyət müddəti 2018-ci ilin oktyabr ayında başa çatırdı. Bu il oktyabrın 17-də növbəti prezident seçkisi keçirilməli idi. Fevralın 5-də prezident İlham Əliyevin sərəncamı ilə aprelin 11-nə növbədənkənar prezident seçkisi təyin edilib. Belə bir səlahiyyət prezidentə 2016-cı ildə konstitusiyaya edilmiş dəyişikliklə verilib. Başqa bir yenilik prezidentin səlahiyyət müddətinin 5 ildən 7 ilə artırılmasıdır.
Mərkəzi Seçki Komissiyası indiyədək 13 nəfərin prezidentliyə namizədliyinin irəli sürülməsini təsdiqləyib. Onların arasında prezident İlham Əliyev, deputatlar Araz Əlizadə, Qüdrət Həsənquliyev, Fərəc Quliyev, Zahid Oruc da var.
