Oğul yanğısı

05-03-2017 01:14 / Bu xəbər 3117 dəfə oxundu

Real hadisə əsasında yazılmış "Cavabsız qalan sual” hekayəsinin müəllifinə...

Ata harayının ahı, ağrısı

Titrətdi ruhumu, sıxdı qəlbimi.

Övlad faciəsi, oğul yanğısı,

Hopub ağ kağıza göz yaşı kimi...

Atalar inanmaz belə gedişə,

Övladı çiynində salsa da yola...

Tələsər həmişə acı görüşə,

Dərddir görüş yeri məzarlıq ola...

Soyuq məzar daşı, doğma baxışlar,

Əyilməz atanın əyib qəddini...

Dodaqlar sussa da, gözlər danışar,

Heç nə ovundurmaz ata dərdini.

Qollar həsrət qalıb oğul boynuna,

Bu nisgil içini didir, göynədir.

Gözlərsə hey baxır məzar daşına

Cavabsız suala cavab gözləyir...

Ölüm haqq olsa da, ilahi, hec kəs,

Vaxtsız bu cığırı keçməyəydi kaş.

Övladlar atadan , anadan qabaq,

Əbədi mənzilə köçməyəydi kaş.

Müşfiq Lerikli