Hacı Məmmədovun intihar etdiyi bildirilir- YENİLƏNİB

Hacı Məmmədovun intihar etdiyi bildirilir- YENİLƏNİB

03-12-2017 23:21 / Bu xəbər 3153 dəfə oxundu

Daxili İşlər Nazirliyinin (DİN) keçmiş polkovniki, çoxsaylı sifarişli qətllər, adam oğurluqları, quldurluq kimi cinayətlər törətmiş dəstənin başçısı Hacı Məmmədovun intihar etdiyi bildirilir.

Bu barədə primetime.az saytı məlumat yayıb. 

Məlumatda deyilir ki, Məmmədov saxlanıldığı 3 saylı cəzaçəkmə müəssisəsində özünü asıb. Onun hansı səbəbdən və hansı şəraitdə özünü öldürməsi hələlik bəlli deyil.
 
***

Hacı Məmmədovun ailə üzvlərindən biri isə xəbəri təkzib edib. 

O, musavat.com-a deyib ki, yayılan xəbər doğru deyil: "Biz Hacı Məmmədovla əlaqə saxlayırıq, danışırıq. Səhhətində problemlər olsa da, vəziyyəti pis deyil”.
 
***

Xəzər rayon Prokurorluğundan APA-ya verilən məlumata görə, hadisə Ədliyyə Nazirliyi Penitensiar Xidmətinin vərəm üzrə ixtisaslaşdırılmış müəssisəsində baş verib. 
 
Müəssisədə müalicə alan Hacı Məmmədov özünü asaraq intihar edib və onun həyatını xilas etmək mümkün olmayıb. 
 
Hazırda hadisə yerində Xəzər rayon Prokurorluğunun əməkdaşları işləyir. 

Faktla bağlı Cinayət Məcəlləsinin  125-ci maddəsi ilə ( özünü öldürmə həddinə çatdırma) cinayət işi başlanıb, intiharın səbəbləri araşdırılır. 
 
Faktla bağlı araşdırmalara başlanılıb.

Daxili İşlər Nazirliyinin Baş Cinayət Axtarış İdarəsinin sabiq baş əməliyyat müvəkkili, polkovnik-leytenant H.Məmmədov 2005-ci il martın 10-da artıq ləğv olunmuş Milli Təhlükəsizlik Nazirliyinin keçirdiyi "Qara kəmər” əməliyyatı nəticəsində mütəşəkkil dəstə üzvləri ilə birlikdə həbs edilib. 

H.Məmmədov həmin il fevralın 10-da Beynəlxalq Bankın İdarə heyətinin hazırda həbsdə olan sabiq sədri Cahangir Hacıyevin həyat yoldaşı Zamirə Hacıyevanı oğurlayandan sonra Milli Təhlükəsizlik Nazirliyi mütəşəkkil dəstənin üzvlərinin izinə düşərək bir ay sonra onları zərərsizləşdirib.
 
2006-cı ildə Bakı Ağır Cinayətlər Məhkəməsinin hökmü ilə H.Məmmədov və dəstənin üzvü kimi təqsirləndirilən, həmin vaxt Daxili İşlər Nazirliyinin Baş Cinayət Axtarış İdarəsinin rəisi vəzifəsində çalışan general Zakir Nəsirov və bir neçə dəstə üzvü ömürlük azadlıqdan məhrum edilib. 

Z. Nəsirovun cəzası bu ilin mart ayında 15 illik cəza ilə əvəz edilib və cəzasının çəkilməmiş hissəsi bağışlanaraq azadlığa buraxılıb.