“Dağlar” MTK-da aldadılanlar dövlətdən kömək istəyirlər

“Dağlar” MTK-da aldadılanlar dövlətdən kömək istəyirlər

17-01-2019 17:51 / Bu xəbər 1244 dəfə oxundu

"Bakıda bir qrup sakin etiraz aksiyalarına başlamaq fikrindədir. Belə ki, aidiyyati dövət qurumlarına etdiyimiz şikayət və müraciətlər nəticəsiz qaldığından, əlacsız şəkildə piket keçirməyi düşünürük". 

Bunu aztoday.az-a "Dağlar” MTK tərəfindən aldadıldığını deyən sakinlər bildiriblər. 

Onların sözlərinə görə, paytaxtın Təbriz küçəsində yerləşən "Konqres” mərkəzi ilə üzbəüz hündürmətəbəli binada ev almaq istəyən 30-dan çox vətəndaş aldadılıb. 

Tikintini aparan "Dağlar” MTK-nın təsisçilərinin mənimsəmədən xəbərdar olsalar da, yalnız Şahin Əliyev adlı bir nəfər məsuliyyətə cəlb edilib.

Şikayətçilər bildirir ki, şirkətin əsas təsisçisi Çingiz Rzayev kimlərinsə himayədarlığı sayəsində məsuliyyətdən kənar qalıb. Məhkəmə qərarı ilə həmin binadakı qeyri-yaşayış sahəsinin zərərçəkənlərə dəyən ziyanın ödənilməsi nəzərdə tutulduğu halda, ona da süni maneələr yaradılıb.

Zərərçəkənlər növbəti dəfə dövlət qurumlarına müraciət ünvanlayaraq kömək istəyiblər:

"Artıq beşinci ildir ki, biz "Dağlar MTK” tərəfindən aldadılaraq evsiz qalmışıq və beləliklə maddi və mənəvi iztirablara duçar olmuşuq. Məhkəmə instansiyalarının ədalətsiz və qərəzli yanaşması ucbatından 20-yə yaxın ailənin mülkiyyət hüquqları pozulmuşdur, nəticədə çıxılmaz duruma salınmışıq.

Cinayət işinin araşdırılması ibtidai istintaqı aparan Korrupsiyaya Qarşı Mübarizə Baş İdarəsi tərəfindən bəsitləşdirildi, ayrı-ayrı epizodlar üzrə baş vermiş cinayət faktları ört-basdır edilərək iri miqyaslı cinayətkarlıq faktı bir nəfər (MTK sədri Şahin Əliyev)  üzərində fokuslayaraq onun həbsi ilə yekunlaşdırıb. Korrupsiyaya Qarşı Mübarizə Baş İdarəsi ilk mərhələdə MTK-ya məxsus 900 kvadrat metr qeyri-yaşayış sahəsi üzərində həbs qoymaqla biz zərərçəkənləri arxayınlaşdırdı. Sonrakı məhkəmə instansiyalarında həbsi "ləğv etmək – bərpa etmək” oyunu qurmaqla bizim taleyimizi qumar obyektinə çevirmişlər. Bu məhkəmə oyunu Ali Məhkəmənin sədrinin təqdimatı əsasında qeyri-yaşayış obyektinə qoyulmuş həbs qərarı ləğv edilib və beləliklə, cinayətkar dəstəyə edilən himayədarlıq məntiqi yekununa çatdırılıb. Nəticədə 20-yə yaxın ailə evsiz qaçqın durumuna salınıb.

Yekun ümid yeri kimi Konstitusiya Məhkəməsinə müraciət etməklə bizim pozulmuş konstitusion hüquqlarımızın bərpa olunacağına əminliyimizi bildirmək istəyirik. Ərizəmizə qoyduğumuz Konstitusiya şikayəti ilə yaxından tanış olmağınızı və üzləşdiyimiz problemin həll edilməsində köməklik göstərməyinizi sizdən xahiş edirik”.